خلال لقائه في البث المباشر لبرنامج «باب 1» أمس، تحدث الكا��تن محمود شاكر عبد الفتاح نجم الاتحاد السكندري ومنتخب مصر السابق، عن عدد من المحطات والذكريات المهمة في مسيرته الكروية، كما كشف عن تفاصيل وآراء خاصة حول مشواره مع زعيم الثغر والعديد من المواقف التي عاشها داخل وخارج الملعب.
ونستعرض لكم أبرز تصريحاته خلال اللقاء:
🟢 عن الاتحاد السكندري وذكرياته مع النادي:
«نادي الاتحاد ده من الأندية اللي كنت أتمنى إني أختم حياتي فيه، إنما هو دايمًا في قلبي، ومافيش خلاف في الكلام ده، ولينا عودة أكيد بإذن الله، طول ما في العمر وقت».
«الاتحاد من أجمل ذكريات حياتي، وهو اللي عرّف الناس بمحمود شاكر، وهو اللي عرّف الكرة المصرية بمحمود شاكر، فما أقدرش أنسى حاجة زي كده أبدًا».
🟢 عن بدايته ومركزه في الملعب:
«أنا ما كنتش بلعب باك شمال خالص، كنت في الناشئين لحد 17 و18 سنة بلعب تحت المهاجمين، مهاجم تاني وجناح شمال».
«كابتن عباس فخري هو اللي قال لي: هلعبك في المكان ده، وإنت هتكون فيه من أحسن اللعيبة في مصر.. ومن وقتها ما خرجتش من مركز الباك الشمال».
🟢 عن انتقاله للاتحاد:
«كابتن شاكر قال لي: نادي الاتحاد ده من أكبر الأندية في مصر، والجمهور والأجواء هناك هتلاقي الكورة حاجة تانية خالص».
«في البداية ما كنتش ماشي كويس، والنقلة والهزة عملوا لي أزمة شوية، وكان فيه كلام إني ممكن أمشي».
«كابتن محمد عمر قال لي: أنا اللي جايبك، وأنا اللي اخترتك، وأنا عندي ثقة فيك، ما تسمعش لأي حاجة ومالكش دعوة بحاجة».
🟢 عن الجيل الذي لعب معه في الاتحاد:
«الاتحاد بالذات أنا مش ناسي مواقف، ومش ناسي أي حاجة، لأنها مش مجرد ذكرى، دي من أجمل ذكريات حياتي».
«كنا فريق مستقر، وكان فيه استقرار كبير في النادي وقت الأستاذ محمد مصيلحي».
🟢 عن فترة مستر كابرال:
«الطفرة اللي حصلت في وقته ما شفتهاش قبل كده».
«إنت عمرك ما تلاقي الاتحاد على مدار 12 أو 13 ماتش ما بيخسرش، يكسب أو يتعادل».
«بعد فترة التوقف طلعنا معسكر، وقعدنا تقريبًا شهر كامل، وبعدها لعبنا 11 أو 12 ماتش، كسبنا 7 وتعادلنا في الباقي وما خسرناش».
«جمهور الاتحاد وقتها كان عامل بوستر للفريق وكتب عليه الفريق الذي لا يُقهر أو لا يُهزم».
🟢 عن جمهور الاتحاد:
«جمهور الاتحاد بالنسبة لنا حاجة كبيرة، وما ينفعش تتقارن بحاجة».
«المدرجات كانت مليانة، والجمهور كان قريب جدًا من الفريق، وكان فيه ارتباط كبير بين اللاعيبة والجمهور».
🟢 عن هدفه الشهير في الزمالك:
«مباراة الزمالك دي كنت عامل فيها ماتش كويس جدًا، وكنا خسرانين 2-1 في الآخر».
«كان فيه فاول ناحية الشمال، وقلت لمحمود سمير يعمل نفسه هيلعب، ويتحرك عشان ياخد نظرة من الحائط».
«دخلت بسرعة في نفس الزاوية اللي كان واقف فيها، وما لحقش يعمل رد فعل.. والحمد لله دخلت جول».
«كل ما حد يكلمني يقول لي: فاكر جولك في الزمالك؟».
🟢 عن الرحيل عن الاتحاد:
«كان فيه كلام إني رايح الأهلي، وكان فيه شبه اتفاق، لكن أنا ما كنتش أعرف حاجة عن الموضوع ده، وكنت مركز مع الفريق».
«ماحدش كلمني في التجديد خالص».
«لآخر وقت كنت متمسك بنادي الاتحاد، وما كنتش عايز أحس إني خذلت النادي أو ضحكت عليه».
«أنا اتصلت أكتر من مرة، وكنت مستني رد، لكن في الآخر ما حصلش تجديد».
🟢 عن عرض المصري:
«النادي المصري كلمني، وكان العرض ضعف اللي كنت باخده في الاتحاد مرة ونص كمان».
«رغم العرض، أنا كنت معتبر الاتحاد بيتي، وكنت مبسوط ومرتاح فيه ومش حاسس بغربة».
«كلمت المسؤول عن شؤون اللاعبين أكتر من مرة، وكنت مستني لآخر وقت قبل ما أتحرك».
🟢 عن الأهلي:
«موضوع الأهلي ما كانش فنيات، حصلت أمور خاصة بالمفاوضات والوكلاء، وفي النهاية الصفقة ما كملتش».
«الأرزاق على الله، وكل حاجة نصيب في الأول والآخر».
🟢 عن أصعب فترات مسيرته:
«أنا شاهد على عصور كتير وأحداث كبيرة، وللأسف حضرت أحداث صعبة جدًا في الكرة المصرية».
«في فترات كنا بنقعد بالشهر والشهر ونص بعيد عن بيوتنا، والظروف كانت صعبة جدًا».
🟢 عن إصابته بالرباط الصليبي:
«كنت وقتها 34 أو 35 سنة، وبصيت للسما وقلت خلاص كده هبطل وأنا في الملعب».
«الدكتور أحمد عبد العزيز كان الوحيد اللي قال لي عندك رباط صليبي ولازم عملية».
«اتعالجت فترة، ونزلت لعبت وأنا مصاب، لحد ما الإصابة زادت واضطريت أعمل العملية».
🟢 عن طنطا:
«رحت طنطا في الموسم الوحيد في تاريخ النادي اللي صعد فيه واستمر في الدوري الممتاز».
«كنت أكبر لاعب موجود، وأعلى نسبة مشاركة، وكنت هداف الفريق وأعلى نسبة مساهمات».
🟢 عن أقرب زملائه في الاتحاد:
«حسين فهمي وجدو كانوا أقرب ناس ليا في الفريق، لأننا كنا عايشين مع بعض وقاعدين في نفس المكان».
🟢 عن والده الكابتن شاكر عبد الفتاح:
«والدي كان من أهم الناس في مسيرتي، وكان دايمًا بيقول لي إن نادي الاتحاد من أكبر الأندية في مصر وإن الجمهور والأجواء هناك حاجة تانية».
🟢 وعن العودة للاتحاد:
«طول ما في العمر وقت، إن شاء الله يكون لنا عودة».
💚 محمود شاكر عبد الفتاح.. واحد من الأسماء اللي ارتبطت بذكريات جيل كامل من جماهير سيد البلد.